كتبه محمد نابلي
(بيدق نهضاوي)
انا شخصيا مع منع التجمعيين جملة وتفصيلا من النشاط السياسي لمدة سنوات
ويوجعني برشا لما النهضة تقبل بيهم يشاركوا في الانتخابات بعد ماكانوا أعوان زور وتزوير في جميع الانتخابات اللي صارت في عهد بورقيبة وبن علي ، ولكن لما نفكر فيها بالعقل نقول النهضة عندها ألف حق
وهاو باش نقوللكم السبب اللي برشا من ولاد النهضة والثورة ما فهموهش
:
لو تم تمرير فصل إقصاء التجمعيين لن تحصل انتخابات ولن تستقر البلاد أبدااااااااا بسبب تلاقي مصلحتين : مصلحة اليسار اللي عارف روحو ماشي لهزيمة جديدة ..ومصلحة نداء التجمع اللي ماعندوش ثقة في استطلاعات الرأي وحاطط احتمال كبير انو يخسر الانتخابات قدام النهضة .
ولهذا ما يلزمش نعطوهم ذريعة حتى يتحدوا للمطالبة بتأجيل الانتخابات ..
التجمعي باش يتحجج ويقول :انتم أقصيتوني
واليساري باش يتحجج ويقول : مازالت شروط الانتخابات ما توفرتش (ويبدا يجبد في تحييد الإدارة والمساجد والأمن و و و و ) حتى يتهرب من الانتخابات وما تتكشفش عورتو .
النهضة قالت انا نحب على الانتخابات لأني واثقة من الشعب انو ذكي وتوا يفهم انو الانتخابات هاذي ما وصلنالها إلا بفضل ربي سبحانو ثم بفضل تنازلات النهضة اللي برّدت النفوس ومنعت الفتنة الأهلية وامتصّت الاحتقان من الأنصار والخصوم وقدمت دستور يوفق بين الإسلام والحداثة و تحسدنا عليه بلدان العالم المتقدم زيادة على العالم المتخلف .
لو قبلت النهضة بالفصل 15 سيخرج التجمعيون ويقولوا النهضة خايفة منا وتريد إقصاءنا ..وهكاكا يفسدوا فرحة التونسيين بانتخاباتهم الجاية ويطيحولهم معنوياتهم ويخفضولهم في نسب المشاركة ..
بينما النهضة تحب الشعب الكل يشارك حتى يقوم هو بنفسو بإقصاء التجمعيين عبر انتخابات شفافة يشارك فيها الجميع ويرضون بنتائجها ..
ولمّا يقصي الشعب التجمعيين (اللي موش باش يتحججوا بأنها انتخابات مزيفة أو غير شفافة) وقتها توا يتعرّوا أمام العالم ويبان بالمكشوف ان الشعب طوى صفحة التجمع نهائيااااا وما يقدروش التجمعيين يتعللوا وقتها بأنها انتخابات مزيفة وبالتالي يصبح بالسيف عليهم الاعتراف بنتائجها ..
وتصبح بالتالي نتائج الانتخابات هاذيكا حجة للنهضة وللأحزاب الثورية حتى تقيم الدليل على انها ما ظلمتش التجمعيين وانو الشعب بالفعل ماعادش حاجتو بيهم ..
تخيّل معي لو المجلس أقصى بنفسه التجمعيين (وما تنساش حجم النهضة فيه) ، وقتها توا التجمعيين باش ينساو انو كل الكتل تقريبا أقصاتهم و يقولوا : النهضة هي اللي أقصاتنا لأنها أكبر حزب في المجلس وهي الفاتقة الناطقة فيه لأنها خايفة منا ، ويمشوا يعملوا دورة في دول العالم ويعملولنا فضيحة دولية ويقولوا : " دستوركم هذا كي بيه كي بلاش بلّوه واشربوا ماه مادام يحكي على المساواة وحرمنا من حقنا في المشاركة السياسية "
وباش يقولوا أيضا : " النهضة عملت دستور يكفل المساواة بين المواطنين ولكنها في أول اختبار حرمتنا من المشاركة في الانتخابات وبالتالي هاذي انتخابات موش باش نستعرفوا بيها وموش باش نقبلوا باللي باش يربح وباش نكسرولوا خدمتو كيما كسرناهالو العامين اللي فاتو"
(معناها على الحساب هذا باش نعديوا 5 سنين أخرى والبلاد مقسومة على معسكرات والخدمة واقفة و ما فماش ) وطبعا فما بلدان تستنى فيها الفرص هاذي حتى تدخل بين الظفر واللحم وتبعث فلوسها المرنّخة بريحة البترول حتى تفسّدلنا ثوراتنا وتقنع مواطنيها انو لا فايدة تعملوا ثورات مادامها فشلت في (بلد المنشإ) وكلكم تتذكروا دولارات جويلية وأوت كيفاش وصلت البلاد لحافة الهاوية ووكّلت المعتصمين في اعتصام الخسّة كسكسي وروز بالفاكية .
هل الشعب بهيم حاشاكم حتى يقبل بالتجمع من جديد ؟؟؟
هل الشعب مستعد يركّب الناس هاذم من جديد على ظهرو حتى يزيدوا ينهبوه ويستغلّوه ؟؟؟
هل الشعب سيدي تاتا حتى يصدق ان اللي نهبوا خزينة البلاد وسرقوا البنوك والأراضي والضيعات والمؤسسات العامة والخاصة ونشروا ثقافة (طاعة المعلّم والحجّامة) طلعوا نظاف ويستاهلوا يقودوا البلاد من جديد بعد ما خربوها ؟؟؟
طبعالالالالا لا
إذن علاش خايفين ومتشككين من الشعب ؟؟؟
هاي طلعت النهضة واثقة في الشعب أكثر منكم ومتأكدة انو موش باش يربّح التجمعيين
فكونوا مثلها وهيا فيّقوا الناس الوفية للثورة واللي تكره التجمع والتجمعيين حتى تشارك بكثافة في الانتخابات الجاية وتقطع عليهم الطريق .
